دونیا زیبیل آلتیندا بوغولماقدادیر !
مارس آیی نین ۳۰ نجو گونو صیفیر زیبیل یا دونیا اوزره زیبیل سیز گون اعلان اولونوبدور ، گوترش میللت لر سازمانی نین باشچی سی بو مناسیبته دانیشیغیندا دئییب کی دونیا زیبیل آلتیندا بوغولماقدادیر و کاملا دوغرو بیر اویاریدی ، ائله اوز اولکه یا اوز شهریمیز و یاشام چئوره میزی نظرده آلاراق بیر اوتری گوز دولاندیرساق نه فاجعه باش وئریب و داها درینلشمه سینی حس ائده ریک .
یول قیراغیندا چوب یوخدور کی باشیندا بیر نایلون قیریغی اسمه سین ،
چای لارین قیراغی ، کورپولرین آلتی پلاستیک تیکه لری ، سو قابلاری ، شوشه قیریخلاری ، پارچا ( لباس ) کهنه لری و …. دولودور ، داغلار ،مئشه لر
دنیز قیراغی ساحیل لر خولاصه بشر آیاغی چاتان هر یئرین دورومو بولاردان قالان دئیل . بیر سوزده دئسک سانکی بو زیر زیبیل بشر الی اییله دئیل بلکه بیر ئیردن قایناییب یئر اوزون تامام فتح ائله مه یه هجوم گتیریر . انسان اوغلو یئنی عصرلرده علمین ، تکنولوژی نین گلیشمه سیندن آرتیق فایدالاناراق ، یاشادیغی چئوره نی هئچه سایار کیمی داورانیر، یعنی بیر طرفدن یئر کوره سینده اولان یئر آلتی، یئراوستو ، دنیز ، مئشه و هر نه کارا گلن قایناق وارسا سوموروب سویون چکیر ، او بیر طرفدن بو لاردان یارانان زیبیل لری ده هارا گلدی بوراخیر ، ائله بیل کی یازیق طبیعتین زیبیل ماشینی وار و گلیب بولاری یئغئیشدیراجاق .
ایش اورا چاتیب کی کونو ملل سازمانین دا گوندمه گلیر . آزاجیق گلیمیش اولکه لری دئمیرم بلکه بیر سیرا قانون و مقررات گئچیره رک اوز یئرلرینده بیر ایشلر گوره بیلسین لر آنجاق اوز اولکه میز و بیزه تای لار دا ، سیستم بیر اساسلی و گوزه گلن تاثیرلی ایش گورمه سینه اومودوم یوخ ، آنجاق اومود ائتدیگیم نوقطه وطنداشلارین بو کونودا بیر آز مسئولیت داشییب سوروملو دوارانمالاریدی ، دوشونورم کی هر تک تکیمیز اوزوموز و یاخینلاریمیزدان باشلاییب بیر ایشلر گوره بیلسک بلکه بیر عمومی تاثیری ده اولور .
بو داورانیش اوچ یونتم ده اولمالیدیر ، بیرینجی ، زیبیل چیخارتما ؛ مومکون قده ر و باشاردیقجا پلاستیک کیمی شی لر که اوزون زامان تجزیه اولمور آز استفاده ائدیب زیبیل چیخارمایاق ؛ ایکینجی ؛ زیبیل نئجه آییریما و اوچونجوده بو آیریلمیش زیبیل لری نئجه دفع ائتمه دیر ، چول باییری اوز ائویمیز بیلیب اورا نی اولدوغو کیمی تمیز ساخلاماقدا چابا گوسترمک ، منجه یاخشی بیر وطنداش اولمانین اونملی پارامترلریندن بیری بو کونودا سوروملو داورانماقدادیر ، هردن طبیعتدن قاییدان وطنداش لارا راست گلمک اولور کی کوله لرین نایلون یا دا آیری توللانتی لار اییله دولدوروب گئری قایتاریرلار ، بو کیمی انسان لار اللری اوپوله سی قده ر احتراما لاییقدیرلر .
ژاپون بویوک کارگردانی آکیرا کوروساوا دئرسو اوزالا آدلی بیر فیلمی واردیر کی گئچمیش شوروی آدلانان اولکه ده چکیلمیشدی ، دئرسو سیبری بولگه سیندن اولان بیر اوره گی پاک ، روحو تمیز ، جانلا دوغایا باغلی و ایشینه بلد بیر یئرلی دیر کی ، بیر گروه نظامی خریطه چیه ( نقشه بردار ) بلدچی لیق ائلییر ، فیلمین بیر بولومونده نظامی لر ، نئجه دقیق نشان جی ( تیر انداز ) اولما یاریشین دا بیر شوشه نی بیر ساپلا آغاجا باغلاییب ، یئرعالاییب و شوشه نی وورماغا چالیشیرلار ؛ دئرسو اولاری گوردوکده نه ائتدیکلرینی سوروشور و دئییر کی اولار منده یاریشا قاتیلیم بو شرطی اییله کی ، شوشه دئیل اوندان آسلاندیغی ساپی نشان آلیم ، ساپ قیریلدیقدا شوشه منیم اولسون و ائله ده اولور….
کریم دلاویز 🖌
